ភ្នំពេញ៖ រដ្ឋាភិបាលជប៉ុនបានផ្តល់ហិរញ្ញប្បទានឥតសំណងចំនួនជាង ៥១លានដុល្លារអាមេរិកដល់កម្ពុជាសម្រាប់អនុវត្តគម្រោងអភិវឌ្ឍសេដ្ឋកិច្ច និងសង្គមកិច្ច។
រដ្ឋមន្ត្រីការបរទេសកម្ពុជា លោក ប្រាក់ សុខុន និងឯកអគ្គរាជទូតជប៉ុនប្រចាំកម្ពុជា លោក មីកាមិ ម៉ាសាហ៊ីរ៉ូ បានចុះហត្ថលេខាស្តីពីការផ្ដល់ហិរញ្ញប្បទានឥតសំណងរបស់ជប៉ុនជាង ៥១លានដុល្លារ ក្រោមអធិបតីភាពដ៏ខ្ពង់ខ្ពស់របស់នាយករដ្ឋមន្ត្រីកម្ពុជា សម្តេចតេជោ ហ៊ុន សែន និងនាយករដ្ឋមន្ត្រីជប៉ុន លោក គីស៊ីដា ហ៊ីមីអូ (KISHIDA Fumio) នាថ្ងៃទី១២ ខែវិច្ឆិកា ឆ្នាំ២០២២។
ហិរញ្ញប្បទានឥតសំណងរបស់ជប៉ុននេះ នឹងបែងចែកសម្រាប់អនុវត្តគម្រោងនីមួយៗ។ ក្នុងនោះថវិកាចំនួន ១៧លានដុល្លារអាមេរិកសម្រាប់អនុវត្តគម្រោងសាងសង់អគារហ្វឹកហ្វឺន និងអគារផ្សព្វផ្សាយអប់រំយល់ដឹងពីសង្គ្រាមនៃមជ្ឈមណ្ឌលសកម្មភាពកំចាត់មីនកម្ពុជា។
ទឹកប្រាក់ចំនួន ៨លានដុល្លារអាមេរិកទៀតសម្រាប់អនុវត្តកម្មវិធីអភិវឌ្ឍន៍សេដ្ឋកិច្ច និងសង្គម។ ជំនួយ ៣លានដុល្លារអាមេរិកទៀតសម្រាប់អនុវត្តគម្រោងកែលម្អការគ្រប់គ្រងសំណល់វេជ្ជសាស្ត្រដែលអាចចម្លងមេរោគ» និងជំនួយ ២៣លាន៣សែនដុល្លារ បន្ថែមទៀតសម្រាប់អនុវត្តគម្រោងពង្រីកសមត្ថភាពប្រព័ន្ធផ្គត់ផ្គង់ទឹកស្អាត រោងចក្រភូមិព្រែក។
ហិរញ្ញប្បទានឥតសំណង ដែលផ្ដល់ដោយរដ្ឋាភិបាលជប៉ុននេះនឹងរួមចំណែកយ៉ាងសំខាន់ដល់កិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការពន្លឿនការអភិវឌ្ឍសេដ្ឋកិច្ច និងសង្គមកម្ពុជា ព្រមទាំងពង្រឹងបន្ថែមទៀតនូវកិច្ចសហប្រតិបត្តិការល្អដែលមានស្រាប់ និងចំណងមិត្តភាពជាប្រពៃណីរវាងប្រទេសទាំងពីរ៕